Boş aynıñ 5

1909 s. Tuvaq köyünde, Qırım, pedagog, jurnalist, milliy areketniñ tesisçileri ve teşkilâtçılarından biri,
dissident Ceppar AKİMOV (05.11.1909–21.07.1983) doğdı.

1935–1941 ss. — terciman, soñra Qırım oquv-pedagogik devlet neşriyatınıñ yolbaşçısı. 1941 s. orta küz ayında Krasnodarğa tahliye etildi, anda "Qızıl Qırım" gazetiniñ muarriri olıp çalıştı. 1942 s. Qırımğa partizanlarğa atılğan edi, 1944 s. Qırımnıñ azat etilmesine qadar işğal etilgen topraqlarda beyannameler bastırıp tarqata edi. 1944 s. quralayda Özbekistanğa Bekabad şeerine sürgün etildi. 
1950-inci senelerniñ ortasında milliy areketniñ tesisçilerinden biri, Bekabad teşebbüs grupasınıñ lideri oldı. Areketniñ bir çoq vesiqasınıñ, Ekinci Cian cenkiniñ ve partizan areketiniñ iştirakçileriniñ imzaları ile merkeziy akimiyet organlarına ilk muracaatnıñ müellifi. 1966 s. qırımtatar halqınıñ altmış beş vekilinden ibaret olğan delegatsiyanıñ terkibine kirdi, olar Sovet Birliginiñ Kommunist firqasınıñ XXIII syezdine muracaatnı teslim etmek içün vekâletli ediler. 1966 s. orta küz ayında "qırımtatarlar arasında milletçi teşviqat ve milliy duşmanlıqnı qozğatqanı içün" Sovet Birliginiñ Kommunist firqasınıñ terkibinden çıqarıldı. Ve bundan soñ tezden apiske alındı. Davanıñ açılmasına sebep, 1972 s. quralaynıñ 18-nde "Quralaynıñ 18-i qırımtatarlarnıñ Vatandan sürgün etilüv künü" yazılı matem bayraqlarını asıp qoyması oldı. Üç yılğa apishanege qapatıldı. Azat etilgen soñ küreşini devam etti. O, Özbekistanda Bekabadda vefat etti.