Boş aynıñ 30
1916 s. Qulçora köyünde (Qırım) biohimiya ve deñiz biologiyası saasında alim, biologiya ilimleri doktorı (1958)
Zore ABLÂMİTOVA (Vinogradova) (30.11.1916–18.05.1989) doğdı.
1938 s. başlap ŞSCB Alimler Akademiyasınıñ Qaradağ biologik stantsiyasınıñ ilmiy hadimi. Ekinci cian cenki vaqtında o, tahliye etilgen edi, 1945 s. Ise Qaradağ biologik stantsiyasına qayttı. 1947 s. namzetlik dissertatsiyasını qorçaladı, onda Qara deñizdeki bir sıra omurğasız ayvanlarnıñ himiyeviy terkibiniñ ögrenilüvi ilk sefer tasvir etildi. Qara deñizde balıqlarnıñ "tük taşlaması"nı ilk sefer keşf etti ve tarif etti. 1953 s. Odesada ŞSCB Alimler akademiyasınıñ gidrobiologiya institutınıñ biologik stantsiyasında çalıştı. 1958 s. "Qara deñiz balıqlarınıñ qaraciğerinde A vitamini" adlı doktorlıq dissertatsiyasını qorçaladı. 1964 s. başlap Cenübiy deñizler biologiyası institutınıñ Odesa bölüginiñ hadimi, anda biohimya bölüginiñ reberi. "Deñiz organizmleriniñ biohimiyası" temel işiniñ müellifi (Kıyiv, 1967). Odesada vefat etti.
1878 s. Aşçiшar köyünde, Dobruca, Romaniya, şair, jurnalist, oca, alim ve Romaniya qırımtatar diasporasınıñ faali
Memet NİYAZİY (30.11.1878–29.11.1931) doğdı.
Qırımda ocalıq yaptı, amma ükümet tarafından "işançsız şahıs" olaraq sürgün etildi. Romanyada yerli qırımtatar mektebinde (1906) ocalıq yaptı, osmanlı tarihından lektsiyalar oqudı, osmanlıca, şiiriyet ve nesir, fars edebiyatı ve kelâm derslerini berdi. 1910–1914 ss. mektep müdiri vazifesinde çalıştı. 1916 s. İslâm ilâhiyatı fakültetiniñ dekanı. 1909 s. "Dobruca sadası" mecmuasına, "Teşviq", "Işıq" gazetalarına, "Mektep ve aile" mecmuasına muarrirlik yaptı. 1918 s. Qurultay Qırım Halq Cumhuriyetini ilân etken soñ, Qırımğa köçti. Qırımtatar faallerine qoşuldı, "Aq söz" gazetasına muarrirlik yaptı. Bağçasarayda Zıncırlı medreseniñ müdiri olıp çalıştı. Qırımda sovet akimiyeti qurulğan soñ Romanyağa qaytmağa mecbur oldı, mında ömrüniñ soñki künlerine qadar oca olıp çalıştı. 1911 s. İstanbulda "İthafat" ya da "Bağışlavlar" adlı ilk şiirler cıyıntığı, 1931 s. Pazarçıqta (Romanya) "Sağış" şiirler cıyıntığı neşir etildi. Şairniñ bir çoq şiirleri 1919 s. İstanbulda neşir etilgen "Kök kitap" ve 1935 Köstencede neşir etilgen "Qırım şiirleri" cıyıntığına kirsetilgen. Romanyada, Mecidiye şeerinde vefat etti.