Boş aynıñ 3
1933 s. Otarköy köyünde, Qırım, professor, fizika-himiya ilimleri doktorı,
Macaristan, İsveçiya,Finlândiya ilimler akademiyasınıñ fahriy azası,
Rusiye ilimler akademiyasınıñ ve Kembric universitetiniñ akademigi
Sabri İZİDİNOV (03.11.1933–21.10.1995) doğdı.
S.İzidinovnıñ qorantası Sibirge sürgün etildi. Soñra Tacikistanğa köçti. Şarq tilleri fakültetine millet mensüpligi sebebinden qabul etilmedi, himiya fakültetine kirdi ve bu saada bayağı muvafaqiyetlerge irişti. Çetelde 300-den ziyade ilmiy iş ve maqaleleri derc etildi, 50-den ziyade keşfiyatı ve icadı sanayıda qullanıldı. Bütünittifaq elektrotehnika institutında çalışqan alimniñ yaratqan keşfiyatları onıñ adını taşıy. Tahminen 20 tilni, şu cümleden arap, fars ve şumer tillerini bile edi. O, çüy yazısını oquy edi. 1955 s. başlap Taşkentniñ milliy yaşlar areketine qoşuldı.
1972 s. qorantasınen beraber Qırımğa qayttı, amma tek 80-nci seneleri qayd oldı. 1990 s. Aqyarğa köçti, II Qurultay işinde iştirâk etti. Qırımtatar medeniyetini canlandıruv programmasını tizdi. Qırımda vefat etti, tuvğan köyü Otarköyde defn etildi. 1996 s. qadını Sevil İzidinova ve Meryem Resüleva Aqyarda professor S.İzidinov adına Vaqıf teşkil ettiler
1936 s. Aqmescitte, Qırım, çalğıcı, bestekâr, folklorcı, muzıkaşınas,
yırcı Fevzi ALİYEV doğdı.
1944 s. Özbekistanğa sürgün etildi. 1972–1978 ss. Taşkentte "Qaytarma" qırımtatar devlet ansambliniñ muzıka reberi ve dirijöri olıp çalıştı. 1978 ss. başlap Özbekistan ŞSC Devlet teleradiosınıñ qırımtatar muarririyetiniñ muzıka muarriri edi. 1994 s. oğullarınen beraber "Destan" ansamblini meydanğa ketirdi. Qırımtatar estrada ve caz muzıkasınıñ temelcisi olaraq, tango, tvist, bosanova, caz-vals, rumba, tehno, rep, intermetstso janrlarında özgün eserler yarattı. Ukrayinada nam qazanğan medeniyet hadimi, Qırımda nam qazanğan sanat erbabı, eki kere cumhuriyet mukâfatlarınıñ laureatı, Bekir Çoban-Zade adına Halqara mukâfatınıñ laureatı. Qırımtatar halqınıñ 800-den ziyade yırını toplap, neşirge azırladı. "Yırcı dalğalar", kitabınıñ, "Eski zaman qırımtatar maqamları", "Qırımtatar muzıkası ve caz" ve diger maqalelerniñ müellifi. Müellifniñ esas işlerinden biri "Qırım halq muzıkasınıñ antologiyası"dır (2001). Bu cıyıntıqta qırımtatarlar, Qırım qarayları, Qırım çingeneleri, qırımçaqlar, Romaniya ve Türkiye Qırım diasporasınıñ muzıka folklorı bar.