Boş aynıñ 21

1951 s. Mırzaçöl şeerinde (Özbekistan) maden işleme ustası
Asan GALİMOV (21.11.1951–15.10.2019) doğdı.

Sürgünlikte doğdı. 1989 s. Qırımğa köçti ve Aqmescitte ecdatlarınıñ eviniñ bir qısmını satın alıp oldı. 1994 senesinden başlap, qırımtatarlarnıñ ameliy sanatını, hususan, ananeviy cezvelerni canlandırmağa başladı. A.Galimov — büyük silâ ustası, örnek ressamı Amet Kalafatovnıñ soyundan kele. Meşur dedesiniñ icadiy mirasını faâl surette qıdırdı ve onıñ işini devam ettirdi. O, örnek, örnek grafikası, qaqma resim ile çalıştı. Esas eserleri: dekorativ kompozitsiyalar — "Cennet quşu" (1980), "Mahsuldarlıq" (1985), "Simurğ" (1997); "Baâr" (1994) dekorativ savut; qadın quşaqları, cezveler (1995 s.); "Ümüt", "Muvafaqiyet" (1996); "Avdet" (1997). Onıñ işleri Aqmescitniñ ülkeşınaslıq müzeyinde, AQŞ, Almaniya, İngiltere, Poloniya, Türkiye ve diger memleketlerniñ şahsiy kollektsiyalarında saqlana. 2004 s. Qırım MC Medeniyet ve sanat nazirliginiñ teşekkürnamesine nail oldı ve Qırımnıñ çoqmilletli medeniyetini teşviq etkeni ve qol tutqanı içün Ukraina halq sanatı ustaları milliy birliginiñ Qırım bölüginiñ diplomınen taqdirlendi. Qırım MC-de nam qazanğan ressam (2010). Aqmescitte vefat etti, "Abdal" mezarlığında defn etildi.