Orta küznıñ 9

1935 s. Azerbaycanıñ Baku ş. 1960–1970 ss. uquq qorçalav areketiniñ iştirakçisi,
oca, yazıcı, stsenariyci İlya GABAY (09.10.1935–20.10.1973) doğdı.

İ.Gabay adı dissidentler arasında 1965 s. belli oldı. Onıñ vatadaşlar uquqını qorçalamaq içün yapqan ilk aşkâre çıqışı Moskvada 1965 s. ilk qış ayınıñ 5-inde "Aşkarelik mitingi"nde olğan edi. Aradan bir ay keçken soñ onı yaqalaylar. Bir yıldan soñ Lefortovo SİZO-sına qapaylar. Pyotr Grigorenko ve Aleksey Kosterin vastasınen İ.Gabay qırımtatar milliy areketiniñ faalleri Mustafa Cemilyev, Rollan Qadiyev, Zampira Asanovanen yaqından tanış ola. 1968 s İ.Gabaynı kene yaqalaylar ve Taşkentke yollaylar. 1969 s. ilk küz ayında M.Cemilyevni yaqalaylar. Onıñ işi İ.Gabaynıñ işinen birleştirile. Olarnıñ ekisini de «sovet devletine ve cemiyet qurumına zarar ketirecek yalan fikirlerni darqatuvda» qabaatlanalar. 1970 s. İ.Gabay üç yıl umumiy rejim koloniyasına, M.Cemilyev – üç yıl qattı rejim koloniyasına üküm etile. 1972 s. İ.Gabay azatlıqqa çıqa. O, dissindent areketi boyunca safdaşlarından Pyotr Yakir ve Viktor Krasinniñ güya oña qarşı malümat bergenini ögrene. Bu onı teren depressiyağa oğrata ve Gabay intihar ete. Bakuda yeudiy qabristanında defin etile.