Orta küznıñ 23
1909 s. Qırımnıñ Bağçasaray şeerinde vesiqalı kino operatorı,
ressam Mansur BARBUTLI (23.10.1909–07.03.1992) doğdı.
1929–1930 ss. Aqmescitte "Yeñi dünya" ve "Yaş quvet" gazetalarınıñ fotokorrespondenti olıp çalıştı. 1933–1941 ss. Moskva, Qazan ve Kuybışev kinohronika studiyalarınıñ kinooperatorı.
Ekinci cian cenki devrinde 4-inci Ukrayina cebesiniñ kinooperatorı, Kiyev, Çehoslovakiyanı azat etüvde iştirak etti. Tank desantı terkibinde Mukaçevo-Ujgorod yönelişinde vesiqalı çekim yaptı. "Çehoslovakiyanıñ azat etilüvi" (1944–1945) filminiñ yaratılmasında iştirak etti. 1981 s. qadar Şimaliy Kavkaz kinohronika studiyasında rejissor-operator olıp çalıştı. "Kosta Hetagurov" ve "Tsey deresinde" filmleri içün Montevideoda ötkerilgen Halqara kinofestivalniñ diplomınen taqdirlendi (1957). Pyatigorskta vefat etti.
1932 s. Qırımnıñ Ayserez köyünde içtimaiy erbap,
Nyü-Yorktaki Qırım cemiyetiniñ prezidenti
Fikret YURTER (23.10.1932–01.05.2020) doğdı.
1944 s. kiçik qış ayında qorantasınen beraber Avstriyadaki Landek kontslagerine ketirildi. 1948 s. qorantası Türkiyege icret etti. 1970 s. Nyü-Yorkqa köçe. Qırım cemiyetiniñ prezidenti etip saylana. Prezidentlik devrinde Nyü-York şeerindeki Qırımtatar dernegine bina alına. 1976 s. Memet Sevdiyar ve Mübeyin Altannen beraber Sürgündeki Qırım Tatarlarınıñ Öz Vatanlarına Qaytarılması Komitetini quralar ve şu sene Qırım Vaqıfını teşkil eteler. Bu Vaqıf türk, ingliz ve rus tillerinde qırırmtatarlarnıñ küreşi aqqında kitaplar neşir ete. M.Sevdiyarnıñ yardımınen Özbekistandan Qırırmğa qaytqan qırımtatarlarnıñ taqip etilmesini beyan etken gizli vesiqalar kitabı neşir etile. Birlik mecmuasını neşir eteler. Dünyada birinci kere qırımtatarlarnıñ sürgünine bağışlanğan "1944 senesi quralay ayı 18" (1986) eykeliniñ teşebbüsçisidir. Abide Long-Aylenddeki qırımtatar mezarlığında tiklendi.
F.Yurter SSSR dağılğan soñ Qırımğa kelmege muvafaq oldı. Ayserezdeki eski çeşmeni tamir ettirdi, doğğan köyünde ev qurdı, 2014 s. Qırım işğaline qadar yaz aylarını anda ötkere edi. 2008 s. hatıralar yazmağa başlay, lâkin sağlığı sebebinden bitirip olamay. Nyü-Yorkta vefat etti.