Orta küznıñ 12

1927 s. Qırımnıñ Foti-Sala köyünde yazıcı, publitsist, qırımtatar milliy areketiniñ iştirakçisi
İdris ASANİN (tahallüsi Camcı) (12.10.1927–06.08.2007) doğdı.

1944 s. quralay 18-de bütün qorantasınen Özbekistannıñ Samarqand vilayetine sürgün etildi. Sürgünlikte ana-babası, ağaları ve apteleri sıtma hastalığından vefat ettiler. İ.Asanin qız qardaşınen sağ qala. 1950 s. halq arasında belli olğan sürgünlik aqqıdaki şiirleri ve qırımtatarlarnı Vatanına qaytarmağa çağıruvları içün yaqalandı. 25 sene lager cezasına üküm etildi. Stalinniñ ölüminden soñ işi qytadan baqıldı ve ceza müddeti 10 senege tüşürildi. 1956 s. azatlıqqa çıqtı. İ. Asanin qırımtatar yazıcıları arasında yaratıcılığı içün repressiya yapılğan ve sağ qalğan yekâne GULAG mabusıdır. 1988 s. Qırımğa qayttı ve Bağçasarayda yerleşti. Yaratıcılığını devam ettirdi. 1991 s. qırımtatar halqınıñ II Qurultayına vekil etip saylandı. Qırımdaki arheologik, tarihiy-mimariy abidelerni ve müsülman azizlerini ögrenüv ve saqlav boyunca "Azizler" cemiyetini qurmağa teşebbüs kösterdi. 1997 s. — UYMB azası. "Bir avuç topraq" (1997) şiirler kitabınıñ; milliy areketniñ belli iştirakçileri aqqındaki üç cıltlı "Adalet küreşi saifelerinde" (2002, 2005, 2006) kitabınıñ müellifi. Kitapnıñ IV cıltını İ.Asaninniñ avalesinen, vefatından soñ jurnalist Zera Bekirova neşir ettirdi. Bağçasarayda vefat etti.