Orta küznıñ 10

1941 s. Bağçasarayda qırımtatar milliy areketiniñ veteranı
Seydamet MEMETOV (10.10.1941–13.03.2010) doğdı.

1944 s. quralay 18-de qorantasınen beraber Özbekistanğa sürgün etildi. 1960-ncı senelerniñ başında milliy areketke qoşuldı. 1977 s. Qırımğa köçmege areket ete, Saq rayonındaki Lesnovka köyünden ev satın ala. Vatanda yerleşmege areket etken qırımtatarlarnıñ taqip etilüvı aqqında malümat toplay. 1979 s. saban ayınıñ 15-inde S. Memetov bir yıl qattı rejimli lagerge ve "aramtamaqlıq", "çıqarılmaq aqqındaki ükümni becermemek" ve "pasport qaidelerini bozuv"da qabaatlanıp 4 yıl sürgünlikke üküm etile. Oña qarşı beş kere cinaiy iş açıla, olarnıñ üçü apis cezasınen yekünlene. 
1990 ss. Qırımğa qayta, qoranta qura. Yuriy Bekirovnıñ ölüminden soñ NDKT işlerine reberlik yapa, milliy areket arhivini saqlay. Ağır hastalıq neticesinde Qırımda vefat etti.

1961 s. Taşkentte qırımtatarlar
Enver Seferov ve Şevket Abduramanovnıñ mahkeme işi baqıldı.

1961 s. orta küz ayında Taşkent vilayet mahkemesi E.Seferov ve Ş.Abduramanovnıñ sovetlerge qarşı terğibat alıp baruv ve milletler arasında niza teşviq etüv ve doğuruvda qabaatlanğan işini baqtı. Mahkeme Seferovnıñ "qırımtatarlarnıñ milliy duyğularından faydalanğan alda, sovet akimiyetine zarar ketirmek ve zayıflaştırmaq mündericesini taşığan vesiqalarnı azırlağanını, çoqartqanını ve darqatqanını, Abduramanovnıñ ise "Çırçıq ealisi arasında darqatqanını" tasdiqladı. E. Seferovnı edi sene, Ş. Abduramanovnı ise beş sene qattı rejimli koloniyağa yollamağa üküm etti.