Qara qışnıñ 9

1918 s. Birinci Qırımtatar qurultayınıñ fevqulâde oturımı açıldı.

Qurultay İdaresiniñ Reisi olaraq Cafer Seydamet saylandı.

1931 s. Qırımdaki Aq-Monay köyünde biyologiya ilimleri doktorı, professor, Lenin adına umumittifaq
köy hocalığı akademiyasınıñ mühbir azası, Rusiye ilimler akademiyasınıñ azası
Zebri ŞAMSUTDİNOV (09.01.1931) doğdı.

İlmiy araştıruvları saasına ösümlikşınaslıq, selektsiya, ösümliklerni taqdim etüv ve qurğaq ekosistemalar kirmektedir. Qurğaqlı iklim içün 18 çeşit yem ösümligini meydanğa ketirdi. 300-den ziyade ilmiy iş, şu cümleden 27 kitap, olardan 10 danesi monografiya derc etti. Keşifleri içün 16 müellif şeadetnamesini aldı.

1938 s. Qırımdaki Aqmescit şeerinde siyasetçi, Qırımtatar Milliy Meclisiniñ azası
Cülvern ABLÂMİTOV (09.01.1938–14.04.2010) doğdı.

1944 senesi mayıs 18-de Özbekistanğa sürgün etildi. 1991 s. Vatanına avdet etti. Qırım Yuqarı Şurasınıñ deputatı (1994–1998), Qırımtatar Milliy Meclisiniñ azası. 1997 s. ekim ayından başlap, millet vekilligi vazifesiniñ soñunace Qırım Yuqarı Şurası Milliy siyaset ve sürgün etilgen vatandaşlarnıñ meseleleri boyunca daimiy komissiyasınıñ yolbaşçısı edi. 1998 s. çiçek ayından başlap, sürgün etilgen qırımtatarlarnıñ avdet etüvnen oğraşqan iş gruppasınıñ terkibinde çalıştı. 2010 s. qural aynıñ 14-de Aqmescitte vefat etti.