Qara qışnıñ 6

1963 senesi Özbek SSC-de siyasetçi,
Qırım İqtisadiyat Naziriniñ muavini, Bağçasaray rayon devlet memuriyetiniñ reis muavini 
Rustem ÇİYGOZ (06.01.1963–02.01.2010) doğdı.

1985 s. Harkiv müendislik-qurucılıq institutını bitirip, iqtisadiy tasil aldı. 1989 s. Qırımğa köçti ve Bağçasaray rayonındaki Qalımtay köyünde qırımtatarlarnıñ ilk toplu yaşağan yerlerinden birini teşkil etüvde faal iştirak etti. 2000-nci seneleri siyasiy faaliyetini başladı. 1994 s. Bağçasaray rayon devlet memuriyetiniñ reis muavini vazifesine tayin etildi. Qurultaynıñ 4-nci ve 5-nci çağı-ruvlarınıñ delegatı edi. 2002 s. Qırım İqtisadiyat Naziriniñ muavini vazifesine tayin etildi. Ra-yonnıñ iqtisadiy ceetten inkişaf ettirilüviniñ ve yatırımlarnı celp etüvniñ faal tarafdarı olıp, aynı vaqıtta Qırımda köy hocalığı ile turizmniñ inkişafına qol tuta edi. Qırımtatar siyasetçisi Ahtem Çiygoznıñ ağası edi. Bağçasarayda vefat etti.

1993 s. Aqmescitte Temsil etilmegen halqlar ve milletler teşkilâtına (THMT) qoşuluvğa dair vesiqalar paketi qabul etildi.

Birleşken Milletler teşkilâtında temsil etilgen millet ve halqlarnıñ çeşit türlü teşkilât ve areketleriniñ temsilcileri tarafından 1991 s. kiçik aynıñ 11-de Gaagada göñüllilik esasında teşkil etilgen demokratik, halqara cemaat teşkilâtıdır. Temel halqlarnıñ, işğal altındaki milletlerniñ, azınlıqlarnıñ ve dünyada yeterli derecede temsil etilmegen mustaqil devlet ve topraqlarnıñ ittifaqıdır. THMT-nıñ maqsadı, öz devletleri olmağan temel halqlarnıñ menfaatlarını, azalarınıñ insaniy ve medeniy aq-uquqlarını, etraf müitni qorçalav, olarnen bağlı davalarnı barışıqlıq yolunen çezüv vastalarını qıdıruvdır. Qırımtatarlar THMT-da Qırımtatar Milliy Meclisi tarafından temsil etilmektedir.