Qara qışnıñ 4

1860 s. Qırımdaki Qarasuvbazar şeerinde quyumcı, dekorativ-ameliy sanat ustası
Amet QALAFATOV (08.01.1860–1942) doğdı.

Ustanın icadı tek Qırımda degil, çetelde de pek meşur edi. 1925 s. Parijde Dünya halq dekorativ-ameliy sanat sergisinde, 1937–1938 s. Qırımda, 1939 s. Moskovada teşkil etilgen sergilerde iştirak etti. Bütün mahsulları üstünde ustanıñ şahsiy tamğası bar edi. Qırım ressamları birliginiñ azası (1940). A. Qalafatovnın eserleri müzeylerde ve şahsiy kollektsiyalarda saqlanmaqtadır. 1942 s. Qarasuvbazarda vefat etti.

1924 s. Qırımdaki Keriç şeerinde Ekinci cian cenki vaqtında Primorskaya ayrı ordusınıñ istihbaratçısı 
Alime ABDENNANOVA doğdı (04.01.1924–05.04.1944).

İstihbarat gruppasınıñ terkibinde bulunıp, Keriç yarımadasında yerleşken natsist birlikleri aqqında malümat topladı. Cebeniñ öbür tarafına müim malümatlar yollap, sovet ordusına Qırım yarımadasını natsistlerden azat etmege yardım etti. 1944 s. kiçik ayda gruppa meydanğa çıqarılğan, bütün azaları yaqalanğan edi. 1944 s. çiçek ayınıñ 5-de Aqmescitte qurşunğa tizildi. Qızıl bayrak ordenine (1944) nail olunğan edi.

1945 s. Perm vilâyetindeki mahsus qasabada qırımtatar milliy areketiniñ iştirakçisi,
1969 s. olıp keçken "Taşkent makeme davasınıñ" eñ genç iştirakçilerinden biri
Münire HALİLOVA (04.01.1945) doğdı.

Qırımtatar milliy areketine Özbekistanda qoşulğan edi. "Taşkent makeme davasında" qabaatlanğan 10 qırımtatar aq-uquq qorçalayıcısı Svetlana Ametova, Reşat Bayramov, Ayder Bariyev, Ridvan Gafarov, Rollan Kadıyev, Riza Umerov, İzzet Hayirov, Ruslan Eminov, İsmail Yazıciyev ile bir sırada Münire Halilova da bar edi. Rusiye Federatsiyası Ceza Qanunınıñ "Sovet devletini ve içtimaiy qurumını qaralağan aselet yañlış uydurmalarnı tarqatuv" 190-1. maddesine binaen bir yıllıq apis cezasına maküm etilgen edi. 1990 s. Qırımğa avdet etti. Sürgün edilip, qaytayatqan qırımtatarlarnıñ aququqlarını faal şekilde qorçaladı, vatanperverlik miting ve piketlerde iştirak etti.