Qara qışnıñ 17

1955 s. Özbekistandaki Fergana şeerinde qırımtatar ressamı,
grafik sanatçısı, dizayncı, animatsion filmleri ressamı Enver İZETOV (17.01.1955) doğdı.

Aqmescitteki Qırımtatar sanat müzeyiniñ teşkil eticilerden biri (1992), Qırımtatar ressamları birliginiñ (1992–2001) qurucılarından biri ve reberi. 1997 s. başlap, "Qırım. Er bir millet ressamdır" adlı Bütünukrayin bala resimleri biyennale sergisiniñ teşkil eticisidir. 1999 s. berli "Biyennale Qırım" hayriye birleşmesiniñ prezidenti.

"Özbekfilm" kinostudiyasında çıqarılğan "Yabancı" (1987), "Tahir ve Zuhra" (1988), "Kontsert" (1990) multfilmlerniñ ressamı-sanalaştırıcısıdır. Meşur eserleri: "Metamorfozlar" devresi (1981), R. M. Rilke ve P. P. Pazolininiñ (ekisi de 1983 s.), T. Hyüz ve M. Lutsi (ekisi de 1985 s.) şiir cıyıntıqları içün resimler; "Ne içün horaz ve tavuq bir kümeste yaşaylar" qırımtatar halq masalları (2002), "Ana tili", "Fidançıq" derslikleri (2007); "Gurzuf tüşleri" (2006); "Avdet" gazetiniñ logosı (2006); "Bütündünya qırımtatar kongressi" işareti (2007); "Qırımtatar ressamları" albomlarını resimleştirüv (Aqmescit, 2008), "Ay yarıq gecesinde" (2015) albomlarını süslev ve digerleri.

1991 s. Aqmescitte milliy mustaqillikleri içün küreşken Baltıq milletleri ile birdemlik mitingi olıp keçti.

Litvaniya taa 1990 s. saban ayınıñ 11-de mustaqilligini ilân etip, SSCB-den çıqtı. Amma 1991 s. qara qış ayınıñ 8–13 künleri sovet ükümeti Litvaniyanı arbiy yolnen SSCBne qaytarmağa tırıştı. Azatlıqnı qorçalav oğrunda silâsız vatandaşlar şeer içinde silâlı askerler ve tanklarğa qarşı çıqtı. Çatışuvlar neticesinde askerler qurşunlap ve sovet tanklar basıp cemi olaraq 14 kişini öldürdi. Qara qış ayınıñ şu facialı künlerinde Litvaniyağa qoltutuv olaraq qırımtatarlar Aqmescitte birdemlik mitingini keçirdiler. Mitingniñ teşebbüsçisi Qırımtatar milliy areketi teşkilatı edi.