Qara qışnıñ 13

1681 s. 1676–1681 cenkiniñ neticeleri esasında Bağçasaray barışıqlıq añlaşması imzalanğan edi.

Bir taraftan Qırım hanlığı ile Osmanlı devleti, diger taraftan ise Moskova çarlığı arasında barışıqlıq añlaşması imzalandı. Añlaşma 20 yıllıq müddet içün imzalandı ve bu devletler arasında Sağ yalısındaki Ukrayina topraqlarına saip olmaq içün yapılğan cenklerni toqtatqan edi. Añlaşma Zaporijya Ordusınıñ Baş kâtibi Semen Rakoviçniñ uzurında Türkiye Sultanı IV Mehmed adından Qırım Hanı Murad Geray, Rusiye Çarı Aleksey Mihaylovıç adından stolnik V. Tâpkin ve kâtip N. Zotov tarafından imzalanğan edi. Añlaşmağa köre sultan Rusiye çarınıñ Sol yalısındaki Ukrayina topraqlarınen beraber Kyiv, Vasılkiv, Trıpillâ ve Didivşçına (şimdiki Kyiv vilâyetiniñ köyleri) ve Özü özeniniñ sağ yalısındaki Radomışl üzerindeki üstünligini tanıdı. Çarnıñ akimiyeti Zaporijya Siçinde de üküm süre edi. Podillâ ve cenübiy Kyiv topraqları Türkiye idaresi altında qalacaq edi, tatarlar ise cenübiy Ukrayina çöllerinde dolaşmaq ve avlamaq aqqını saqlap qaldırğan edi. Devletler arasındaki sıñır Özü özeni boyunca keçecek edi. Ukrayina temsilcisiniñ talabı üzerine sultan Cenübiy Bug ve Özü arasındaki kozak topraqlarına yerleşmemekni ve Rusiye çarı kibi, Ukrayina şeerlerinde yaşağan kozaklarnı imayesi altına qabul etmemekni vade etken edi. Rusiye hanğa er yıl haraç (bergi) tölemege mecburiyetinde edi. Ukrayinalılar serbest Özü özeninde ve onıñ qollarında raat balıq tuta, linamlarından tuz çıqara ve Özü boyunca Qara deñizge qayıqlarınen keze bilecek edi.