Qara qışnıñ 10

1907 senesi Qırımdaki Beş-Tarım köyünde alim-tilşınas, cemaat erbabı, Ekinci cian cenkiniñ iştirakçisi,
qırımtatar milliy areketiniñ faali Basır ĞAFAROV (10.01.1907–1991) doğdı.

Milliy medeniyetimizniñ inkişafına büyük isse qoştı. İsmail Gaspıralınıñ faaliyetini araştırdı. Rusça-qırımtatarca luğatnıñ tertip etüvnen oğraştı, qırımtatar tili ve umumen olaraq Qırım ile bağlı edebiyatnıñ bibliyografik köstergiçini tertip etti. Kartoteka ile luğatınıñ aqıbeti al-azırda belgisizdir. 1950-ncı yıllarınıñ ekinci yarısında qırımtatar halqınıñ Qırımğa avdeti oğrundaki areketke qoşuldı, milliy areketniñ taktika ve strategiyasını şekillendirüvde faal tarzda iştirak etti. 1991 s. ilk yaz ayında Moskovada vefat etti, amma vasiyetine binaen Aqmescit vilâyetiniñ Bulğanaq köyünde defn etildi. Şahsiy kitaphanesinden 2000 kitap İ.Gaspıralınıñ adını taşığan Qırımtatar cumhuriyet kitaphanesine bağışlandı.